1 Corinthians 11
1 aNgamuli 'ili'ilixo noxilo aloxo eni emulinu 'ili'ilixo noxou Kalisito.'Ili'ilixo sou Umaxa'u Lalotu Maninasou
2Eni a'osasinge sou ngaxavutalaleli mo mimii tapiena e eni epotongengi no anu la ngetetelisou pekia'u loxo eni evikalangengi no anu. 3 bIa vaimomo 'o eni emasaxainge sou ngalavu lexe ngingi ta mulu ukalusi kisinge 'a Kalisito, xe ngingi ta sema kisinge 'a ta mulumengi, xe Kalisito kisou 'a Lataua. 4Xo ta mulu ukalusi ane'i ane ilavusou ilinga mo ipalomatana io isuasou kisi'a la ane'i itaxaanu kisi'a uasi. 5Xe ta sema ukalusi ane'i ane ilavusou ilinga mo ipalomatana io isuasou kisi'a uasi la ane'i itaxa anu kisi'a uasi. Anu aloxo ane'i ane milui kisi'a. La sou anu laixe lexe ta sema isuasou kisi'a. 6Ia lexe sema ne ilavusou isuasou kisie uasi la ane ixotosou laxusie mo uxali ataxusi. Xe lexe ane imaela sou ixotosou laxusie, la ane isuasou kisie. 7 cMamu sou itema usu'asou kisou. Xo anu loxo tovola'isou Lataua mo tokolomo noxou Lataua mo u'itinu Lataua. Ia sema ne ane tokolomo laixe noxou mulue. 8 dXo mulu muxali noxie sema uasi. Sema mixali noxou mulu. 9Aloxo ne la sou anu ukoinu mulu ie sema uasi, mukoine sema iu mulu. 10Tava'u aloxo ne la sou sema isuasou kisie sou sosovosou xavi ane ne sou ta angelo imaisou. 11Tila la sema ixolu va'axu mo xe mulu uxolu va'axu mo uasi, xo mulu ne anu sou usu'uline sema xe sema ne sou isu'ulinu mulu. 12Aloxo ne xo sema mixali noxou mulu, la sou mulu muxali noxie sema. Ia mimii ukalusi ne molu noxou Lataua. 13La sou ngingi menge ngailevingengi la. Xo lexe sema ane isuasou kisie uasi io ilinga noxou Lataua la ane mi'oxonu 'ilixo laixe ane? 14'Ilixomenge nenge ta mitemasi ulosienge lexe itema ane kisou laxusou veveenu la anu mu'oxo 'ilixo masua sou maela. 15Ia lexe sema e laxusie veveenu ne, la ane tokolomoxe? Xo laxusie veveenu ne sou usu'asou kisie. 16Ia lexe itema vile umasaxa lexe uvikala tumalou no anu mimii ane nenge tevikala no anu 'o, ia nexi tamulinu 'ilixo vile la uasi mo ta tema lalotu noxou Lataua i'oxo aloxo 'o.La'ilali Noxou Tila
17Ioxe vaimomo 'o eni emasaxa lexe avikalangengi no 'a 'ilixomengi se'i e eni a'osasinge no anu uasi. Xo no anu pitapita noxinge sou vaivaikala la, 'ilixo laixe vile uxali no anu uasi. 18 eXo tei la eni elomu lexe no mine ngingi ngane'e ngapita loxo ta mitema no 'a lalotu, la kalikalipala uxolu no nixi noxinge ne noxi'a se'i. Eni elavusou manina. 19Male lexe kalipala uxali no nixi noxinge aloxo ne la sou ngingi ngatongongengi laixe sou ngalavusi'a ane'i ane masaxa noxou Lataua muxolu noxi'a manina. 20La sou no mine ngingi ngapita loxo ne la la'ilali ane ngingi ngao'ou ne anu loxo la'ilali noxou Tila uasi. 21Xo loxo ngingi vile ne u'ou, la vile no nixi noxinge ne, uavuti ka u'ou ukalu avile mole utapaxa'a se'i. La sou vile uxamuli lexe musolixu xe vile ulai uie mo u'oxovulaulau. 22Loxovaa taasinge sou nga'ani mo ngaie no anu uasi? Mo loxovaa ngexavutala lexe ta mitema e ilotu noxou Lataua ne anu mii vitanisi la sou ngingi nge'oxone'i ta vivinge ane'i ane xa'a la'ilali uasi mimaela no nano no anu ne? Mii ma'ia ane sou eni alemolu noxinge? Male nge'oxo lexe eni e'osasinge no 'a 'ilixo ane ne? Uasi manina.23Xo vaikala ane eni eno'u mune'e noxou Tila ne eni kalumo elosinge. No 'olovoxo la Tila Iesu e mixiu tumali'a noxou ne muno'u veleti. 24Xe no mine lexe sou use'inu, la muvikala laixe musuku no anu la muvikala aloxo 'o, “Ane 'o ne eni vasimelo e alosinge mo ngingi ukalusi nga'ou mo sou ngaxavutalaleli no anu.” 25 fMo iouvilesisi aloxo nesi no mine mio'u la'ilali mukalu la anu mutetelisou paku io muvikalasou la, “Paku ane 'o anu sosovo sou vaikala alavua ane misakiinu. Anu 'o ne eni sialuxo. Nga'oxo aloxo ne, ngingi ukalusi ngaie no anu mo sou ngaxavutalaleli.” 26Aloxo ne la sou lexe ngingi vile uo'u veleti ane ne xe uie no 'a paku ane ne la utotomu ne anu uxavutala soli noxou Tila ne ulai utalo no mine anu ulivu une'e.
27 gLa sou lexe 'ena'ei ane mu'ou veleti ane ne xe muie no 'a paku noxou Tila ne ia anu uxavutala laixe uasi no anu la anu mu'oxo susu no anu Tila vasimolu ilou sialuxu ne. 28La sou itema molu uxavutala tei 'o xe ili'i la anu u'ou veleti ne xe uie no 'a paku ane ne. 29Xo lexe se'i i'ani xe iie ia itaxa Tila vasimolu ne uasi la vasimolu ne utulusi'a no 'a vaivaikalasou. 30Anu aloxo ne la sou tavu'alo noxinge ne, pekia'a uasi xe se'i mipipiena xe tavu'alo ne misoisoli a vile. 31Ia lexe nenge menge tailevi maulinenge laixe tei 'o la sou nenge tatulu no 'a vaivaikala uasi. 32 hIoxe no mine nenge tatulu no 'a vaivaikala noxou Tila, la anu loxo nenge texolu no laaxu tu'umaxu sou 'ilixo masua noxinge sou taxali u'isalili mo sou nenge tatulu no 'a vaivaikala uasi loxo ta mitema sou lialia itulu no anu vaivaikala. 33La sou ta vivilo no mine ngingi ngane'e ukalusi sou nga'ani la laixe sou ngaxomaie'i ta menexinge se'i 'o. 34Ia lexe vile noxinge ne usolixu la laixe sou u'ani no taasou xo loxo 'o io pitapita noxinge ne uxalixu 'ilixo sou itelo vaikala noxinge. No mine eni ane'e la sou eni aisalilinoxu vaikala pa'usou noxinge.
Copyright information for
ATA